Lingvongs venner

Med 50-60 cm snø er julastemninga på plass på Lingvong den 17. desember.

God jul og godt nytt år til alle venner av Lingvong!

Boka til Oddgeir Bruaset er kommen i bokhandelen, med Lingvong på omslaget. Den 26. oktober var forfattaren på kulturhuset på Sand og kåserte rundt temaet i boka. 150 frammøtte i salen skrøytte og let vel, og boksalet gjekk strykande. 

Forutan eit kapittel via Lingvong finn me i boka mykje godt stoff frå Sauda (Berdalen, Hellandsbygda) og Suldal (Ulladalen, Berge, Selland m.m.). Her er og eit interessant kapittel om Ramsfjellgardane i Hjelmeland. Elles stoff frå ulike avsidesliggande gardar i sørfylket og Nedstrand.

Boka kjem i oppdatert nytt opplag til jul, der ein del småfeil er retta opp. Ei opplagd julegave til ein Lingvongsvenn!

Johnny & Co var oppe for å samla heim dyra helga 15-16/10. Ved eit uhell strauk heile flokken gjennom heialeet og opp på Varaheia. 5 dyr vart ikkje gjenfunne, og går att der oppe. Truleg vil dei sjøl finna og ta vegen ned til gards att, men Johnny må inn att med flåte og dyretransport. Helikopterpiloten i området er orientert og følgjer med. Han har gjort fleire vender over området, utan resultat.

Jon Nærheim var heilt oppe til leet den 20.10., men såg ikkje snurten av dyra.

SISTE: Søndag 23.10. gjekk alle 5 dyra på bøen, sjå bildet. Dei vart henta heim til Sandnes den 29.10.

Til hausten kjem NRK`s Oddgeir Bruaset med ny bok. "Dei veglause gardane i Ryfylke" er arbeidstittelen til forlaget Genesis. Her vil Lingvong få eit eige kapittel, der gardssoga og særleg Knut får brei plass. Forlaget driv nå og samlar inn bilde, og dei plukkar rikesleg frå galleria på våre nettsider, både av gamle og nye bilde. Me gler oss alt til jul!

Ved sida av å laga den populære programserien "Der som ingen skulle tru o.s.v" har Bruaset gitt ut mange lesverdige bøker, desse vil me varmt anbefala: "Nådelaust liv i gåvmilde Hardanger", "Eg bur oppå ein plass - i Sogn" og "Folket langs Storfjorden" (I og II).

At det blei surt ver, det visste me, for i år fekk me ikkje den 1. helga i juni som me pleier. Men helga var svært vellukka, mykje vart gjort (sjå galleri), mykje vart sagt og fortalt, og hummøret var på topp. 

Deltakarar: Oddvar & Margarita Sildelid, Ane Berg, Grete Tengesdal, Gunn Aud Bakken, Jon & Øyvind Nerheim, Torgeir Øverland, Bjarte Skipevåg, Ingar Haug, Ann Hilde Liarbø, Astrid Fattnes.

Takk til alle for ei super helg!

37 reinsdyr observert i Litleheia like sør for Breiastølen/Risvatnet frå helikopter i dag 3. mars. I bakgrunnen, under skydotten, ser me Lingvong.

Det er uvanleg mykje snø i Ryfylkeheiane i vinter. Sidan foreninga starta på Lingvong i 1998 har me aldri sett så mykje snø der oppe som i år. Som me ser dekkar snøen gjerdet og fleire av pålane, så der er nok like oppunder 1 m snø. Bildet er tatt den 18. februar, etter ein strabasiøs skitur frå Hamrabø. Det var såvidt det let seg gjera å krypa ned i bislaget.

Den 17. november er det 6-7 cm snø på bøen, og vinterfreden har senka seg over Lingvong. På bøen er det mykje hjortaspor å sjå, i lia nedanfor treffer me  på orren.  

Johnny Bråtveit, Berit Løland & co var på Lingvong helga 16.-17. oktober og henta høglandsfeet heim til Sandnes. Det var 17 dyr her i år som har beita innmarka sidan mai. Så det måtte 2 vender til med flåten til Hylen. I Hylen tok stuten seg ein tur i det fri, men det lukkast å få han på bilen til slutt.

Me har fått opp eit helikopterhiv med materialer til husavøling denne månaden. Nå er det på plass i løa. Nå kan vinteren berre komma. 4 dagar etter at dyra var farne kom det 30 cm snø, så det var på høg tid.

Foto: Jon Nærheim m/mobil, kvelden før heimturen

Nå renne brorparten av vatnet i Lingvongselva gjennom tunellen til Sauda. Men Saudefaldene er pålagt ei viss minstevassføring i elva, 450 l/sek., og slik ser fossen ut nå.

Med minimal nedbør dei siste 2 månadane er tilsiget nedanfor inntaket lite, me må difor tru at fossen normalt vil vera større enn dette.

 Fleire som har sett fossen etter reguleringa er forbausa over at den er såpass stor. "Var dette noko å bråka om?" seier dei. Andre minner om flaumar og snøsmelting. "Fossen er temma, og det blir aldri det same" seier dei. Berre sjekk fotoalbuma på desse sidene!